Tit 1 | PMA | STEP | Inau Pol, eisisil onen Ahi ka eiloheh onen Iesu Kristo. Ahi rie latnau ka Iesu sila nau makataun demkatien onen meatin koa Ahi rie lat keil ihi onen. Ka sila inau mun keke nisakin keil ilea anatinien ten sise koa akilea avamai avamal en meten Ahi.

Titus 1

1 Inau Pol, eisisil onen Ahi ka eiloheh onen Iesu Kristo.

Ahi rie latnau ka Iesu sila nau makataun demkatien onen meatin koa Ahi rie lat keil ihi onen. Ka sila inau mun keke nisakin keil ilea anatinien ten sise koa akilea avamai avamal en meten Ahi. 2 Koakeil akilea avousil vati demkatien enek veni amundesin Ahi keke hesan moulien koa sakras vavus min keil. Veni mulamu en avong Ahi mumon out netan, kei vat kati keke hesan moulien enek minir. Ka kei sakras valuvos. 3 Ka en avong koa kei vit mal, Ahi ten mututien sakin aneite ten hatkatien onen vakistal. Kei mul kistal en selusien keil koa Ahi sani minau, ka meng kat nau keke mahiteni min meatin sav keil.

4 Taetas, keik kosuval natkuli kati, ka namutis minuk veni demkatien oralu vatte tas.

Navisi keke Ahi Tamer ka Iesu Kristo, koa mututir, luhesan more envatien ka tomat onealu hel enuk.

Mukave Keke Avaling Elda Keil

5 Navong nalinguk komules en out Krit, navisuk keke kovoum vasin tounah koa lomum rani mules en meatin onen Ahi keil. Ka navisuk kovatie lat elda keil ten sukul en meteimal vasi. Kindem kat selkatien keil onak: 6 elda tai, sakien onen hetolas, ka ahin onen hetas. Titan keil usil Iesu ka sakien one hetahos keke meatin sav keil asakras avasel kutut kat keil avahit vatie keih ka arlong kattei tata one. 7 Navong koling meatin koa vahi metai ten sukul keke valosil kat meatin onen Ahi keil, sakien onen hetolas. Nahitei meatin tahasien, ka tin natamureitei. Nahitei meatin tamunmunien vuo meatin tatituen. Nakurtei mane en sakien koa tisa. !Vuo! 8 Hehi vati meatin koa hekur revi meatin sav en teim sen, ka enhehat tounah koa tahos. Rendemien onen hekeih en umen koa kei vuli kati, ualien onen hetahos, moulien onen hemal, ka kilea valei kat revi sakien keil onen. 9 Metai enek, hehuli kat hihiseien usil Iesu koa roviseini eni. Heilea keke hihiseien keil enek avi anatin. Sakini, kilea valamu en meatin sav en sise ten maluen, e hehisein keil en asa koa vi anatin. Ka munak meatin sav keil iselus karen hihiseien onen, metai enek kilea vatie min keil keke asa koa keil aviteni vi heisav enges.

10 Naviteni mukok veni meatin houlu arvouhoutei en hetetamen keil ten sukul. Hihiseien onen meatin keil enek vi heisavos ka aluvos meatin sav keil amusil keil. Keil aviseini keke meatin onen Ahi keil usil sakien emok onen Siu keil ka iha en vekahoi. 11 !Timoti, evati keke kisakin keil ihat keil en hihiseien tatisa one! Veni keil amul asakin vati amal tei amusil hihiseien one ka aviles ran Iesu Kristo. Ka amumoni mukonek veni evati enges avakur mane eni. !Koanek romaltei! 12 Mari tiser tai telamu onen meatin keil ten out Krit, keinges vit usil sakien keil one vit,

“Koakeil ten out Krit,
aluvos lises, sakien one kalkali,
ave mah ka amules amundem vange en avong vasi.”

13 Selusien enek vi anatin. Sakini, kisel kat keil hekeih. Hesakini, keil usil hihiseien koa mal enges. 14 Anousiltei mun tunien telamu onen Siu keil, vuo mengkatien keil koa ka en meatin keil koa asesein anatinien onen Ahi. 15 Koakeil moulien one mal en meten Ahi, tounah vasi mal en keil. ^{▼▼1:15 Suval 1 Tim 4:3-5 viteni, tiser taluvosien keil avisein meatin keil keke sakien koan ka anien koan emun kilea vasakin meatin vamai vatisa en meten Ahi. Ka Pol vit munak rokuri en rendemien tai koa mutolas, anien vasi keil muto, ka sakien keil suval tetaliheien emun tahos.} Koakeil arkurtei anatinien en Ahi ka moulien one romaltei en meten, tounah vasi romaltei en keil, ven rendemien one vi amus. Keil areingeingen asa koa mal vuo asa koa romaltei. 16 En onge, keil avit akilea Ahi, ka sakien keil one rie lati keke areingeingeni. Armusiltei Ahi, sakien one suval tounah tateavo ka asakras avoumon etai tounah koa vatahos.